Zumaiako `Telmo Deuna´k ere entrenatzaile berria du

Santi Zabaleta oriotarra izango da Zumaiako `Telmo Deuna´traineruko entrenatzaile berria. Arraunlaria izanekoa da eta ez edonolako arraunlaria, gainera. Hogei urtetan aritu da arraunean.Izan ere, estropada asko irabazitakoa da gipuzkoarra. 1997an Kontxako bandera irabazi zuen Orio taldearekin. Bestetik, bost alditan bigarren postua eskuratu izan du. Horretaz gain, San Miguel Liga hiru aldiz irabazi du, Bermeoko Urdaibai taldearekin hiruretan. Gainera, Zumaiako herria ondo ezagutzen du, 2005.urtean Zumaian aritu baitzen arraunean. TKE Ligara igo zen urte berean, alegia. Baina oraingoan ez dator arraunlari gisa, entrenatzaile gisa baino.Estropadak egin zituen azkenengo urtea 2009.urtea izan zen, Urdaibairekin aritu zenekoa. Aurton ez duela arraunean egingo aitortu du. Seguro arraunean aritzen zeneko beste ilusioz entrenatuko duela `Telmo Deuna´. Ea arraunean aritutako hainbeste urtek zerbaiterako balio ote dion...

Agur eta ongi etorri!

2010eko traineru denboraldia amaitu da eta horrenbestez, agurren garaia ere heldu da. Elantxobe Arraun Elkarteko presidente Patxi Egurrolak eskerrak eman nahi izan ditu arraunean taldean aritu izan direnei. Izan ere, arraunlari batzuk euren elkarteetara bueltan joan dira: Lur, Lander,Asier eta Alain Lekeitiora eta Eneko eta Arkaitz, berriz, Portugaletera. “Eskerrak danori, beti izango zarie Artarri. Eskerrak zelan ez beste guztioi; Jon, Markos, Ferni, Beñat, Jon, Rikar, Iñigo...Baita geure julenileri; Erlantz, Iñaki, Aitor, Manda, Zubi... eta batez be, Fernandori. Entrenatzaileak agur diñosku aurten, eta azken urteetan egindako lan ikaragarria Arraun Elkarean beti gogoan izango da. Agur diñoskune Txus be bada, eskerrik asko Txus danagatik”.

Aurpegi berriak

Agurren garaia bada bai, baina baita aurpegi berriei ongi etorria emateko garaia ere. Horregatik Egurrolak elkarteko entrenatzaile berria zoriondu nahi izan du, alegia, Aitor Altzibar lekeitiarra. Bide batez, bere ezkontzagatik ere zoriondu nahi izan du. “Ondo etorria izan Aitor eta zorionak zuri eta zure emazteari zuen ezkontzagatik”.

Astillerok 2011ko denboraldiko arraunlarien taldea osotu du

Astilleroko arraun taldeak 2011.urteko denboraldiko arraunlarien taldea osatutzat eman du. Guztira, 29 arraunlari izango dira, beraz, Astilleron datorren denboraldian. Taldera gehitu diren azkenak Kaiku taldeko Luciano Prego eta Leandro Salvagno izan dira. Taldeko arduradunen aldetik, kalitatean pauso bat emon nahi da. Gainera, Pregorekin batera Imanol Mujicak eta Salvagnok ere taldean ekarpen garrantzitsuak egingo dituztelakoan daude Astillerokoak. Hala, TKE ligako lehen lau postuetan izatea espero dute. Alegia, taldearen helburua TKE mailako faboritoen artean izatea da. Pedreña taldeko David eta Sergio Perez ere datorren denboraldian Astilleroko taldean ikusi ahal izango ditugu.

Jon Salsamendi taldearen teknikaria pozik agertu da osatutako taldearekin. Taldearen osaketa amaitutzat eman duen arren, taldekide berrien gehitzea eta beste batzuen ateratzea ez ditu baztertzen.

Taldeko berezko 18 arraunlari

29 arraunlariren artean 18 dira taldekoak berezkoak. Eta datu hori oso kontutan hartzen du Salsamendik ligari begira. Taldea urtarrilean hasiko da entrenatzen eta bai aulki finkoan eta baita aulki mugikorrean ere arituko direla gaineratu du teknikoak.

Hasi da arraun denboraldia Elantxobekoentzat

Hasi da Elantxobeko arraunlarientzako 2010-2011 denboraldia. Maila txikienetatik hasita, helduenetara. Aurten, aginera, 7-8 urteko umeak ere Elantxobe Arraun Elkarteko arraunlariak izango dira. Oso gazteak diren arren, oso azkar ikasten ari dira arraunean. Ea horrela jarraitzen duten eurak izango baitira etorkizun batean taldeari eutsiko deutsienak.

Entrenatzeko garaia

Urteetan taldean diharduten arraunlariek hasi dute jada arraun denboraldia. Baita arraunean hasi berriek ere. Oraindik hasi ez direnak baino ez dira falta Elantxobeko klubean. Elantxobe Arraun elkartetik dei egiten die arraunean hasi nahi dutenei. Arraunean jakitea ez da arazo taldeko kide izateko. Ez da inoiz berandu ikasteko. Beraz, arraunean hasi nahi duenak Elantxobeko elkarteko ateak zabalik dauzka.

Elantxobe KAE2 mailan izango da datorren denboraldian

Azkenengo estropadetan egindako esfortsu eta pairatutako nekea ez dira nahiko izan Elantxobe Arraun Elkarteak maila mantentzeko. Elantxobe edo Busturialdea KAE2 mailan izango da datorren traineru denboraldian. Egia da, denboraldi hasierako estropadak ikusita ez zela gehiago espero, baina azkeneko estropadak ikusita, aldiz, tortillak buelta emango ziola pentsatzen zuenik ere bazegoen.

Izan ere, hainbat estropada on erakutsi dizkigute Elantxobekoek. Hainbat izan dira baita estropada itzel horietan lortutako puntuak. Baina azkenean ere, bi puntutara geratu da Elantxobe 10.postutik. Alegia, 11.postua eskuratu eta play-off-eko estropadetan parte hartu behar izan du. Play-off-ean gainera, ez da zorte handikoa izan Elantxobe. Lehenengo egunean laugarren postua eskuratuta alde egin behar izan zuen etxera. Bigarrenean, ostera, bigarren egin zuen. Baina hori ere ez zen nahikoa izan irrikaz hartutako maila mantentzeko.

Iazko denboraldian baino puntu gehiago

Puntuengatik bai, baina postuengatik ez zen posible izan Elantxoberentzat aurrera egitea KAE1mailan. Hala ere, kontutan hartzeko datu interesgarri bat ere badaukat. Aipatutako esfortsu eta ahaleginen adibide batekin nator. Izan ere, 2009.urtean baino estropada gutxiago jokatu dira eta horrela ere, iazko denboraldian lortutako puntuak baino gehiago lortu dituzte Elantxobekoek. Zerbait esan gura izango du…

Marearen aurka arraunean aritzea, zailagoa

Pena ikaragarria baina horrelakoxea da arrauna. Marearen aurka zailagoa izaten da arraunean aritzea. Hala ere, ez dira traineruko arraunlariak horregatik kilkilduko. Datorren urteko denboraldian berriz ere KAE 2 mailara igotzeko aukera izango dutelakoan nago. Ez dut horren zalantzarik. Ikusiko dugu eguna heltzean. Gauza bakoitza bere momentuan. Oraingoz, gogor ekin behar izango diete Busturialdeko arraunlariek. Zorionak haiei eta talde guztiari 2010. urteko traineru denboraldia ezin hobeto eramatea lortu dutelako!

Martxan daude geltoki intermodala egiteko lanak

Proiektuak 906.000 euroko aurrekontua du eta bost hilabetetan amaitu gura dituzte obrak.

Gernika-Lumoko garraio publikoa (autobusa, trena eta taxiak) batuko dituen intermodalaren lanak uztailean hasi zituen Udalak, eta gaur egun ere horretan dihardute. Bere momentuan Jose Mari Gorroño herriko alkateak lanokbost hilabeteren buruan amaitzeko asmoa erakutsi zuen.

Egitasmoak 906.000 euroko aurrekontua du, eta irisgarritasuna hobetzea izango du helburu. Horretarako, nasa berriak eta garraiobideetara igotzeko zein jaisteko plataforma berriak ipiniko dituzte. Garraio publikoa zentralizatuta izateaz gain, beraz, «bidaiarientzako baldintzak hobetuko dituen erabilera anitzeko geltokia» egingo dute, alkatearen esanetan.

Lanak, hiru fasetan

Intermodala eraikitzeko lanok hiru fasetan egingo dituzte. Lehenengoan Adolfo Urioste kalea urbanizatzeko asmoa erakutsi zuten, eta horrela egin dute. Uztailean hasi zituzten lan horiek eta egun azkeneko ukituak ematen ari dira.

Bigarrenean autobus geltokia berregituratuko dutela aipatu du herriko alkate den Jose Mari Gorroñok. Bi hilabeteko epean geltokiari «orraziaren itxura» eman gura diote, sei autobusentzako lekua eginez. Irisgarritasuna hobetu eta bidaiarientzako itxaron lekuak eta informazio puntuak ere egingo dituzte. Horretarako, nasak eta plataformak egin gura dituzte, oinezkoei geltokira sartzeko eta irtetzeko modua errazteko asmoz. Gainera, Berga kalearekin bat egingo duen oinezkoentzako pasagunea ere egin gura du Udalak.
Era berean, autobusak aparkatzeko sei leku egokituko dituzte, eta handik zuzenean Iparragirre kalera irtetzeko moduan egokituko dute gunea.

Proiektuaren hirugarren fasean tren geltokiaren aurrean dagoen Geltoki plazaren konponketari ekingo diote. Obra horiekin geltokiaren itxura aldatu nahi dutela azaldu du alkateak, «tren geltokiaren eraikina ikusteko moduan utziko dugu gune hori».

Obren ostean, plaza horrek oinezkoentzako leku gehiago izango duela aurreratu du Udalak, eta ibilgailuak taxientzako eta hango auzokideentzako bakarrik egokituko duten errail mistotik baino ezingo dute pasatu.

Kristalezko markesina

70 metro karratu izango dituen kristalezko markesina ere jarri nahi du Udalak autobusen geltokian, eta bertan dauden komun publikoak ere egokitu eta zabalduko dituztela jakinarazi dute.

Ingurua urbanizatu

Tren geltokiaren aurrean dagoen Geltoki Taxien geltokia, berriz, leku berean mantenduko dute. Autobusen geltokiaren parean legez, tren geltokiaren parean dagoen Iparragirre kaleko zatia ere urbanizatu gura dute. Zorua altxatuko dute, Adolfo Urioste kaleak hartuko duen itxura bera izan dezan. Taxi geltokiaren inguruko eta Loizaga kaleko zorua ere altxatuko dutela aurreratu du Udalak, gune hori ere oinezkoentzako egokitzeko. Iparragirre kaleko errepidea ere igo egingo dute, espaloiaren altuerara. Ciutat de Bergatik Adolfo Uriostera egingo dute hori, Geltoki plazaraino konexioa erraztuz.

Aparkalekuak egokitu

Autobusen geltokia eta tren geltokia batzen dituen kalean aparkalekuak kendu egingo dituzte, etxebizitzen eraikinaren aldean daudenak, hain zuzen. Beste aldean, diagonalean aparkatzeko aukera egongo da. «Kalearen argiztapena hobetzeko ere aprobetxatuko ditugu lan horiek», Gorroñok zehaztu duenez.

Urdaibaik Jose Luis Kortaren aurkako salaketa jarri du

Bermeo-Urdaibai arraun taldeak Jose Luis Korta Kaiku taldeko entrenatzailearen aurkako salaketa jarri du. Bermeoko taldeak Kontxako bandera irabazi ostean izan behar zuen egun pozgarria egun ilun bihurtu dute Kortaren adierazpenek. Izan ere, Kaikuko entrenatzaileak Bermeoko arraunlariak dopatu egin direla adierazi du hainbat komunikabidetan. Adierazpen guzti horiek bildu dituzte Bermeoko taldekoek eta hotiekin auzitegietara jo dute. Orain, auzia abokatu eta epaileen esku dago.

Hain zuzen, Jose Manuel Francisco Urdaibaiko entrenatzailearen aurkako akusazioak egin ditu Kortak; "ibilbide sinestezina dauka entrenatzaile honek», esan du, "positibo kasurik inoiz ez duela izan esaten duenik bada, baina sarri harrapatu dute. Gauza da abokatu onak dituela. Estropaden ondoren bere kargu zeuden hainbat arraunlari ospitaleratu izan dituzte; espero dut gehiago ez gertatzea», esan du.

Hala ere, adierazpen horiek Kortaren ahotik baino ez dira atera. Izan ere, Kaikuko presidenteak adierazi duenez, gainontzeko taldekoek ez dute zerikusirik Kortak esandakoarekin, eta hori dela eta, Korta isiltzen ez bada kalera joango dela aitortu du.